Terwyl ons besig is om die lewe te leef, te werk, te speel, vriende te maak, verlief te raak en elke oomblik te geniet, is dit maklik om minder vermaaklike verantwoordelikhede te ignoreer en beplanning vir die toekoms opsy te sit. Dit is om hierdie rede dat baie van ons, insluitend die meeste mense onder die ouderdom van 30, nie ‘n testament het nie.

Alhoewel die oorweging van ons eie afsterfte en die afhandeling van ons laaste wense ‘n onaangename taak mag wees, is die opstel van ‘n testament meer as ‘n goeie ding om te hê – dit is ‘ n noodsaaklikheid. Veral as ‘n mens dink aan die impak dit kan hê op gesinne en geliefdes as iemand sterf sonder ‘n testament. As jy nog nie ‘n testament het nie, moet die opstel daarvan vir jou ‘n belangrike prioriteit word.

Wat is ‘n testament?

‘n Testament is ‘n wettige dokument wat moet voldoen aan die Wet op Testamente Nr. 7 van 1953. Dit moet skriftelik wees, behoorlik gedateer, getuig en onderteken word. En dit moet verduidelik hoe en aan wie jy wil hê jou bates moet verdeel word na jou dood. As jy ‘n testament het, kan jy jou gekose begunstigdes benoem en ‘n eksekuteur aanstel om te verseker dat jou laaste wense volgens jou bepalings uitgevoer word. ‘n Testament kan ook optree as ‘n vorm van afsluiting vir jou gesin en geliefdes, wat hulle gemak en ondersteuning kan gee tydens ‘n uitdagende tyd.

Terwyl baie mense die fout maak om te dink dat slegs diegene van ‘n sekere ouderdom ‘n testament moet opstel, is die feit dat enige persoon ouer as 16 jaar ‘n testament kan hê en moet hê, en dit maak nie saak hoe klein hulle bates is nie. In werklikheid kan die opstel van ‘n testament ‘n waardevolle hulpbron wees met betrekking tot jou finansiële portefeulje, wat jou die geleentheid gee om jou dekkingsvlak ten opsigte van lewensversekering of begrafnisversekering te evalueer, en om aanpassings aan te bring soos jy goedvind. Op hierdie manier kan beplanning vir die toekoms van jou gesin ‘n belangrike hulpmiddel wees om jou eie finansies in die hede te bestuur.

Waarom is ‘n testament belangrik?

Meer as om jou bloot ‘n idee te gee van jou huidige begrafnisdekking, of die verspreiding van jou bates tussen jou familie en vriende, sal ‘n testament verseker dat enige ander van jou verantwoordelikhede na omgesien word. Dit kan insluit die noem van ‘n voog vir minderjarige kinders, die keuse van ‘n opsigter vir jou troeteldiere, of die aanstelling van ‘n eksekuteur of kurator om toesig te hou oor die verdeling van jou bates om te verseker dat die proses so vlot as moontlik verloop.

As jy kies om nie ‘n testament op te stel nie, of as jy sterf voordat jy ‘n testament opstel, kan jy jou gesin los met die administratiewe probleme en kan dit lei tot aansienlike finansiële verliese. Verder, as jy sterf sonder om jou erfgename te noem, of om te bepaal hoe jy wil hê dat jou bates verdeel moet word, sal jou besittings en boedel verdeel word volgens die Wet op Intestate Erfopvolging, nr. 81 van 1987. Terwyl jou bates steeds onder die familie versprei sal word en nie na die staat sal gaan nie (soos dikwels verkeerdelik verstaan word), kan jou geliefdes met ‘n groot nadeel gelaat word, veral wat boedelbelasting, inkomstebelasting, BTW en kapitaalwinsbelasting betref. Dit is waarom ‘n testament kan help om enige moontlike finansiële laste te verlig en toe te sien dat jou familie en geliefdes jou bates erf volgens jou persoonlike wense en nie volgens ‘n formule wat deur die wet voorgeskryf word nie.

Hoe stel ek ‘n testament op?

Dit is moontlik om self ‘n testament op te stel volgens wydverkoopte template, solank dit aan sekere wettige vereistes voldoen. As jou testament faktore bevat soos die ingewikkelde verdeling van bates, uitgebreide familie of begunstigdes, die benaming van voogde, of afhanklikes of gades uit verskeie huwelike, word dit aanbeveel om hulp te kry van ‘n finansiële adviseur, regsadviseur of ‘n betroubare maatskappy.

Alhoewel die behoefte aan ‘n testament ‘n hele entjie in die toekoms kan lyk, is die feit dat niemand van ons kan weet wat môre kan inhou nie – en om gepaste planne in plek te hê, sal jou help om jou gesin en geliefdes te ondersteun wanneer hulle dit die nodigste het.